طريقة عمل توست الفراخ بالكريمة

طريقة عمل توست الفراخ بالكريمة















المقادير:

½ كيلو فراخ مخلية ومقطّعة مكعبات

2 ثمرة بصل مقطّعة شرائح

2 فلفل رومي ألوان مقطع

4 ثمرة جزر مبشور

½ كوب زيت نباتي

علبة مشروم شرايح

جبنة شيدر مبشورة

2 فص توم مفروم

ملعقة صغيرة قرفة

كيس توست أبيض

علبة كريمة طبخ

ملح وفلفل





الطريقة

1- حمّري شرائح البصل في الزيت في طاسة على النار، وبعد كده ضيفي معاه المشروم والجزر والفلفل والثوم، وقلّبيهم مع بعض كويس أوي لمدة دقيقتين على نار متوسطة.



2- بعد كده ضيفي قطع الفراخ، والقرفة والملح والفلفل، وقلّبيهم كويس مع بعض على النار لمدة خمس دقائق، وبعد كده غطّي الطاسة وسيبيهم مع بعض على النار لحد ما الفراخ تستوي، وضيفي عليها مية كل ما تحتاج.



3-حطّي شرايح التوست في صينية فرن كبيرة، وفوقها ضيفي الفراخ بالخضار، بعد كده حطّي طبقى تانية من شرايح التوست، وصبي فوقها الكريمة والجبنة المبشورة، ودخّليها الفرن لمدة ربع ساعة على درجة حرارة 180، لحد ما وشّها يحمرّ، والتوست يتشرّب بخلطة الفراخ، ولما تبرد قطّعيها وقدميها مع سلطة خضراء ومخلل، وبالهنا والشفا.